今日經濟日報報導49歲前港姐亞軍李明慧為了患自閉症的兒子才啞忍家暴22年，長期遭言語及精神虐待而極度害怕！可見照顧者在照顧自閉症的同事，可能會遭受社會甚至家人眾多的壓力。
香港小姐︱李明慧為嚴重自閉症兒啞忍家暴22年 獨力帶子睇醫生早已對陳燿陽埋下怨恨
【香港小姐/李明慧】49歲前港姐亞軍李明慧於2003年下嫁已故教育家陳樹渠幼子陳燿陽，婚後育有一對現年18歲的龍鳳胎。今年1月，陳燿陽因涉嫌刑事恐嚇及襲擊李明慧而被控上庭，最終裁定罪名不成立，事件雖已結案，但李明慧決定離婚，最近更公開嫁入豪門22年來遭受家暴的慘況，更揭露是為了患自閉症的兒子才啞忍這麼多年！
香港小姐李明慧︱透過姐夫跟陳燿陽相識
李明慧繼早前接受呂詩慧校長訪問，公開受暴力對待之外，女兒Ava亦曾發千字文揭露内情，坦言長期遭言語及精神虐待而極度害怕！但有人質疑為何忍受非人生活22年才決定離婚？李明慧日前再度接受傳媒專訪，就揭開當中原因。
於訪問中，她首先透露跟陳燿陽的相識經過：「當時我姐夫喺一間科網公司度做會計師，而佢就話俾我知公司有一個職位係做市場推廣，問我有冇興趣加入。而我本身都想回流返香港，咁所以我就同佢講話我有興趣。然後姐夫就幫我安排見佢哋公司老闆陳燿陽，我就飛返嚟香港面試，完咗之後就請咗我。工作咗兩年，因科網股泡沫爆破，公司最終在2001年結業。」
香港小姐李明慧︱陳燿陽婚後性情大變佔有慾強
至2001年陳耀陽向李明慧示愛，二人繼而拍拖。陳燿陽當年因公司倒閉而情緒低落，問李明慧可否跟他離開這個傷心地，李明慧一口答應，於是兩人便到美國展開新生活。李明慧以為自己終於遇到真命天子，所以相戀不久即結婚。然而，婚後陳燿陽性情大變兼佔有慾強，開始對李明慧提出各種要求，就算懷孕時稍有不滿意，也會破口大罵。
香港小姐李明慧︱為美國居留權要不停讀書感到極大壓力
李明慧坦言這段婚姻令她很辛苦：「其實每個人嘅婚姻相處嘅時間，係會有好同埋唔好嘅時候。但對我嚟講好深刻嘅係我覺得好辛苦，同好大壓力。因為陳燿陽喺香港嘅生意失敗，佢想留喺美國，而我哋又唔係美國公民，所以我要繼續靠讀書攞學生證，讓佢同我都可以喺美國生活。咁所以我係唔可以停，就係咁我就讀咗兩年碩士，然後再繼續讀博士。」
香港小姐李明慧︱陳燿陽指家規要生孩子
之後陳燿陽又她說，自己家規要生孩子，由於李明慧也很喜歡小朋友，所以願意這樣做，但她的懷孕之路卻不算順利，幾經困難才懷上孩子，終於在2007年順利誕下一對龍鳳胎，這個時候李明慧以為命運終於對她溫柔一次，但這份幸福只維持很短的日子，因為兒子在18月大的時候被確診患有自閉症。
香港小姐李明慧︱淚揭兒子18月大被確診患有自閉症
李明慧眼泛淚光回憶道：「阿仔由出世到依家都好少瞓覺，每晚佢只能夠瞓3個鐘。記得阿仔好細個嘅時候，佢成日會喊，同埋會成日打圈，起初我以為佢係聾同埋啞，因為佢唔會講嘢，同埋我叫佢，佢係唔識得應我，佢同人完全係冇交流，身邊嘅人同佢爸爸都唔肯承認阿仔喺發展上係有問題。變咗我就親自帶佢睇醫生，去了解係咩一回事，見完醫生，先確認佢患上自閉症。」
香港小姐李明慧︱為子女願意啞忍這段婚姻多年
李明慧知道網上有很多不同聲音，有人會覺得22年婚姻過著非人生活，長時間受到精神虐待或肉體的傷害為何不選擇離婚？她作出解釋：「點解唔走呢？最大原因我個仔係有自閉症。而我亦睇到好多關於陳錦鴻嘅訪問，我係好深同感受，了解到要湊大一個自閉症嘅小朋友，要用好多時間同心機同資源，加上又有阿女，令我明白到唔可以離開呢段婚姻。」
香港小姐李明慧︱獨自帶兒子治療仿如單親媽媽
不過小朋友出世後，陳燿陽脾氣反而一直轉壞，李明慧表示：「佢突然要我哋全家搬返香港。返到香港佢嘅情緒問題就更加惡化，佢冇去睇醫生尋求治療，我咁多年來一直都有勸佢要睇醫生。」
同時面對兒子患自閉症，她也沒有被打倒，獨自帶著他覆診接受治療：「每次覆診啲嘅時候，陳燿陽都唔會喺我身邊，我感覺自己好似係單親媽媽，好多嘢都係我自己去做，無論個仔嘅治療，同小朋友返學，都係我一個人去做。其實我對陳燿陽嘅怨恨，已經埋藏喺內心嘅深處度，而我又覺得埋怨都冇用，因為我知佢個人嘅性格係點樣，咁所以我只係默默地去做，做得最好就最好嘅媽媽。」
香港小姐李明慧︱獨自帶兒子治療仿如單親媽媽
這18年間，李明慧從未向外透露兒子患自閉症的事實，為了一對子女着想，她也忍痛守護着這個家，從來沒有半點離婚念頭：「最主要為咗我兩個仔女，我希望可以堅守住呢個家，令佢哋有個完整個家庭成長，喺22年嘅婚姻有好多壓力，有好多嘢唔愉快嘅發生，有暴力同言語上又好，身體上又好，同好多種種嘅屈辱。」
她續指：「阿仔有自閉症，而佢嘅自閉症係嚴重，所以係需要好多啲悉心照顧，需要好多時同耐性，作為一個母親都希望俾一個完整嘅家庭，尤其係畀阿仔。所以我一直都忍讓，堅守住呢個家，我寧願有犧牲，都想我兩個小朋友喺一個完整嘅家成長，呢個係我心願。」但直至1月21日，陳燿陽行動升級，最終她才不忍報警，繼而揭露22年豪門非人生活。