爸爸媽媽們…….加油啊！如果全職工作嘅定義，係每日連續工作超過10小時，我同太太就應該合資格被稱為「在職爸媽」。因為工作可以自由調配地點及時間，換句話說，可以全天候親身照顧一位發展緩慢嘅小朋友。吃力嗎？當然非常吃力！
這樣辛苦值得嗎？
每日只有24小時，為咗可以做到「維持家庭收入」，以及「近身照顧小朋友」，我哋付出嘅代價就係要犧牲休息時間、娛樂及運動等等。
值得嗎？
相信每一位 SEN小朋友嘅家長，都會回答相同嘅答案：
值得！
適應主流小一生活是最大的挑戰
今年最大嘅挑戰係，要適應主流小一生活。
幸好早前我哋精心挑選了一間民風純樸，及唔會「追成績」嘅主流學校，全校教職員及同學們都比較友善和包容，現在小朋友每天都可以開心上學、接受各項挑戰；
只係⋯⋯考試成績稍遜，以及未能擴闊社交圈子。
相信希望在明天！
爸爸媽媽是家庭的火車頭
最後，想同大家分享小小心得：
無論小朋友係屬於任何一類型SEN，爸爸媽媽都一定係家庭嘅「火車頭」。
千祈唔好淨係掛住照顧小朋友，忽略了自己的健康。
因為只有健康嘅爸爸媽媽，先至可以帶住全家人一齊迎接未來嘅挑戰！
大家一齊加油啦！